ໜ້າຫຼັກ / ການເຄື່ອນໄຫວ / ທ່ານເຈົ້າແຂວງ ໄຊຍະບູລີ ລົງຕິດຕາມເບິ່ງເສັ້ນທາງທີ່ເປ່ເພຈາກໄພພິບັດ ຢູ່ເມືອງ ໄຊສະຖານ
ໃນວັນທີ 27 ສິງຫາ 2024, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມພາກສ່ວນທີ່ກ່ຽວຂ້ອງ ໄດ້ລົງຕິດຕາມເບິ່ງສະພາບຄວາມເສຍຫາຍຈາກໄພພິບັດ ຢູ່ເມືອງ ໄຊສະຖານ, ໃຫ້ການຕ້ອງຮັບ ແລະ ນໍາພາລົງເບິ່ງສະຖານທີ່ຕົວຈິງມີ ທ່ານ ສີສະໝອນ ນາມວົງ ເຈົ້າເມືອງ ໄຊສະຖານ ພ້ອມການນໍາຂອງເມືອງ.
ທ່ານ ສີສະໝອນ ນາມວົງ ເຈົ້າເມືອງ ໄຊສະຖານ ໄດ້ລາຍງານສະພາບຄວາມເສຍຫາຍຕໍ່ທ່ານເຈົ້າແຂວງວ່າ: ໃນໄລຍະວັນທີ 15-23 ສິງຫາ 2024 ເມືອງ ໄຊສະຖານແມ່ນໄດ້ຮັບຜົນກະທົບຈາກໄພທໍາມະຊາດ ເປັນຕົ້ນແມ່ນ ຝົນຕົກຫຼາຍມື້ຕິດຕໍ່ກັນ ເຮັດໃຫ້ນໍ້າຫ້ວຍ, ນໍ້າຮ່ອງຕ່າງໆໄຫຼສຸພັດໃສ່ເຂດພື້ນທີ່ທໍາການຜະລິດຂອງປະຊາຊົນ ແລະ ເຮັດໃຫ້ເສັ້ນທາງ ແລະ ຂົວຈໍານວນໜຶ່ງຖືກເປ່ເພ ເຊິ່ງສ້າງຄວາມເສຍຫາຍເປັນມູນຄ່າ 4 ຕື້ກວ່າກີບ, ໃນນັ້ນ: ເສັ້ນທາງເຂດບ້ານ ພູເລີ່ນ-ບ້ານກໍ່-ບ້ານກີ່ວກອກ, ເສັ້ນທາງແຕ່ສາມແຍກ ດອຍກາວ-ບ້ານສະຖານ ມີດິນເຈື່ອນຖົມທາງ, ເສັ້ນທາງແຕ່ສາມແຍກບ້ານ ສະລາ-ບ້ານ ສາມັກຄີໄຊ, ບ້ານ ພູຕຸ່ຍ ແລະ ບ້ານ ເສົາດຽວ ມີດິນເຈື່ອນຖົມທາງ, ຕົ້ນໄມ້ຫັກຂວາງທາງ ແລະ ໜ້າທາງຍຸບຕັດຂາດບໍ່ສາມາດທຽວໄດ້, ປະຈຸບັນອໍານາດການປົກຄອງແຕ່ລະບ້ານພ້ອມພໍ່ແມ່ປະຊາຊົນ ແລະ ພາກສ່ວນກ່ຽວຂອງເມືອງໄດ້ສ້ອມແປງແກ້ໄຂສາມມາດທຽວສັນຈອນໄດ້ຊົ່ວຄາວ, ນອກນີ້ຍັງມີຂົວດາໂຫຼຂ້າມນໍ້າກູດ ຫັກ ບໍ່ສາມາດຂ້າມໄດ້, ມີເສົາໄຟຟ້າເນີ້ງໃກ້ຈຸດດິນເຈື່ອນເຊິ່ງຈະໄດ້ຍົກຍ້າຍເສົາໄຟຟ້າອອກຈາກຈຸດດັ່ງກ່າວ, ມີນໍ້າເຊາະດິນຖົມເນື້້ອທີ່ນາຂອງປະຊາຊົນ ບ້ານ ສາມັກຄີໄຊ 1,5 ເຮັກຕາ, ນາດັ່ງກ່າວແມ່ນບໍ່ສາມາດຊັບຊ່າວຄືນໄດ້, ຈາກນັ້ນທີມງານຂອງທ່ານເຈົ້າແຂວງ ກໍ່ໄດ້ລົງເບິ່ງພື້ນທີ່-ທີ່ຖືກຜົນກະທົບ ເປັນຕົ້ນແມ່ນເບິ່ງ ເສັ້ນທາງທີ່ຍຸບເຂດບ້ານພູຕຸ່ຍ, ເບິ່ງຈຸດທີ່ດິນເຈື່ອນຖົມທາງເຂດບ້ານ ກີ່ວກອກ, ເບິ່ງເນື້ອທີ່ນາທີ່ຖືກດິນຖົມ ບ້ານ ສາມັກຄີໄຊ, ພ້ອມນີ້ທ່ານເຈົ້າແຂວງ ຍັງໄດ້ເຂົ້າເບິ່ງພື້ນທີ່ການປູກກາເຟຂອງປະຊາຊົນເຂດບ້ານ ກໍ່, ການປູກກາເຟຂອງປະຊາຊົນເມືອງ ໄຊສະຖານ ແມ່ນໄດ້ເລີ່ມປູກແຕ່ປີ 2023 ເປັນຕົ້ນມາ ປີນີ້ເປັນປີທີ່ສອງ ມີເນື້ອທີ່ທັງໝົດ 298 ເຮັກຕາ, ມີ 20 ບ້ານ, ໂດຍແມ່ນການລົງທືນຂອງ ບໍລິສັດວິນບິນລີ່ ຈາກ ສປປຈີນ ຊຶ່ງບໍລິສັດສະໜອງເບ້ຍກາເຟ, ຝຸ່ນ-ປຸຍ ແລະ ພະນັກງານວິຊາການຊ່ວຍແນະນໍາດ້ານເຕັກນິກ, ປະຊາຊົມແມ່ນແຮງງານ, ການປົກປັກຮັກສາ ແລະ ເນື້ອທີ່ດິນ, ກາເຟດັ່ງກ່າວແມ່ນ 3 ປີໃຫ້ຜົນຜະລິດ, ຄາດຄະເນສະເລ່ຍ 5 ໂຕນຕໍ່ເຮັກຕາ ໂດຍແມ່ນບໍລິສັດດັ່ງກ່າວເປັນຜູ້ເກັບຊື້ໃນລາຄາກິໂລລະ 10 ພັນກີບ.
