ໜ້າຫຼັກ / ການເຄື່ອນໄຫວ / ເຈົ້າແຂວງ ໄຊຍະບູລີ ຢ້ຽມຢາມ ແລະ ເຮັດວຽກຢູ່ເມືອງປາກລາຍແລະເມືອງພຽງ
ໃນວັນທີ 5 ກັນຍາ 2024 ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມຄະນະ ຢ້ຽມຢາມ ແລະ ເຮັດວຽກຢູ່ເມືອງ ປາກລາຍ, ໃຫ້ການຕ້ອນຮັບມີ ທ່ານ ບຸນຫຼາຍ ວົງດາລາ ວ່າການເຈົ້າເມືອງ ປາກລາຍ, ມີບັນດາການນໍາຂອງເມືອງໃຫ້ການຕ້ອນຮັບຢ່າງອົບອຸ່ນ, ກ່ອນອື່ນແມ່ນໄດ້ລົງເບິ່ງການປູກທົດລອງມັນຕົ້ນທີ່ໃສ່ຝຸ່ນ ແລະ ປຸຍຊີວະພາບ ແລະ ເບິ່ງໂຮງງານສີ-ອົບສາລີຫົວອາຫານສັດຂອງປະຊາຊົນບ້ານ ຜາແກ້ວ, ຈາກນັ້ນກໍ່ໄດ້ຮັບຟັງການລາຍງານວຽກງານທີ່ພົ້ນເດັ່ນໃນ 1 ເດືອນຜ່ານມາຈາກທ່ານ ບຸນຫຼາຍ ວົງດາລາ ເຊິ່ງທ່ານໄດ້ໃຫ້ຮູ້ວ່າ: 1 ເດືອນຜ່ານມາໄດ້ເອົາໃຈໃສ່ ຕິດຕາມບົວລະບັດຮັກສາ ການປູກພືດລະດູຝົນ ປະຈຳປີ 2024 ເຊິ່ງມີເນື້ອທີ່ແຜນການທັງໝົດ 42.300 ຮຕ ໃນນີ້: ການປູກເຂົ້ານາປີ ເນື້ອທີ່ 6.400 ຮຕ, ເຂົ້າໄຮ່ ເນື້ອທີ່ 500 ຮຕ, ການປູກພືດເປັນສິນຄ້າ ເນື້ອທີ່ 34.980 ຮຕ, ພືດສະບຽງອາຫານ ເນື້ອທີ່ 410 ເຮັກຕາ, ສາມາດປະຕິບັດລາຍຮັບໄດ້ທັງໝົດ 7,10 ຕື້ກີບ ເທົ່າກັບ 76,44% ຂອງແຜນການປີ, ຄຸ້ມຄອງລາຍຈ່າຍ ໄດ້ທັງໝົດ 3,29 ຕື້ກີບ ເທົ່າກັບ 67,41% ຂອງແຜນການປີ; ຕິດຕາມກວດກາການສົ່ງສິນຄ້າອອກຕ່າງປະເທດ ໄດ້ 1.560 ໂຕນ, ມູນຄ່າ 392.500 ໂດລາ, ສົ່ງອອກຕ່າງເມືອງ-ຕ່າງແຂວງ ມູນຄ່າ 135 ລ້ານກີບ
ແລະ ໃນວັນດຽວກັນທີມງານຂອງທ່ານເຈົ້າແຂວງກໍ່ໄດ້ຢ້ຽມຢາມ ແລະ ເຮັດວຽກຢູ່ເມືອງ ພຽງ ພ້ອມທັງໄດ້ຮັບຟັງການລາຍງານໂດຍຫຍໍ້ຈາກທ່ານ ບຸດສະກອນ ອິນທະລັງສີ ເຈົ້າເມືອງ-ເມືອງ ພຽງ ເຊິ່ງທ່ານໄດ້ລົງເລິກວຽກງານການກະກຽມກອງປະຊຸມໃຫຍ່ 3 ຂັ້ນຂອງພັກ, ມາຮອດປະຈຸບັນໄດ້ດຳເນີນຊີວິດການເມືອງ ຕິດພັນກັບການດຳເນີນກອງປະຊຸມໃຫຍ່ ຢູ່ບັນດາຄະນະພັກຮາກຖານ, ໜ່ວຍພັກຮາກຖານ ຈຳນວນ 3 ຄະນະນພັກຮາກຖານ ມີໜ່ວຍພັກຂື້ນກັບ 12 ໜ່ວຍພັກ ແລະ ໜ່ວຍພັກເອກະລາດ ຈຳນວນ 7 ໜ່ວຍພັກ ໃນນັ້ນໄດ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຈຳນວນ 19 ໜ່ວຍພັກ.