ໜ້າຫຼັກ / ການເຄື່ອນໄຫວ / ພິທີປະກາດຮັບຮອງວັດສີບຸນເຮືອງ ບ້ານໃຫຍ່ ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ
ພິທີປະກາດຮັບຮອງວັດສີບຸນເຮືອງ ບ້ານໃຫຍ່ ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ ໄດ້ຈັດຂຶ້ນໃນວັນທີ 31 ຕຸລາ 2024 ນີ້ ຢູ່ທີ່ເດີ່ນຫ້ອງການບ້ານໃຫຍ່ ເມືອງໄຊຍະບູລີ ແຂວງໄຊຍະບູລີ ເປັນກຽດເຂົ້າຮ່ວມຂອງທ່ານ ດວງຕາ ໄຊວຸດ ຮອງເລຂາພັກແຂວງ, ທ່ານ ປອ ທອງລິດ ຫຼວງໂຄດ ຮອງຫົວໜ້າກົມມໍຣະດົກ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ເສນ ພັນລັກ ວ່າການເຈົ້າເມືອງໄຊຍະບູລີ, ມີບັນດາທ່ານ ຄະນະປະຈຳພັກແຂວງ, ກຳມະການພັກແຂວງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການ, ອົງການ, ກົມກອງອ້ອມຂ້າງແຂວງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ອົງການ, ກົມກອງອ້ອມຂ້າງເມືອງ, ນາຍບ້ານເທດສະບານ ຕະຫຼອດຮອດພໍ່ແມ່ປະຊາຊົນບັນດາເຜົ່າເຂົ້າຮ່ວມ.
ໃນພິທີການນໍາຂອງແຂວງ, ເມືອງໄຊຍະບູລີ ໄດ້ກາບໄຫວສັກກະລະບູຊາພະເຈົ້າໃຫຍ່, ທ່ານ ດວງຕາ ໄຊວຸດ ຮອງເລຂາພັກແຂວງ ຂຶ້ນໄຕ້ທຽນໄຊບູຊາພະລັດຕະນະໄຕ, ຊົມການສະແດງດົນຕີພື້ນເມືອງຂອງນ້ອງນ້ອຍນັກຮຽນ ຈາກນັ້ນ ຮັບຟັງການຜ່ານຂໍ້ຕົກລົງຂອງທ່ານເຈົ້າແຂວງໄຊຍະບູລີ ວ່າດ້ວຍການປະກາດຮັບຮອງວັດສີບຸນເຮືອງ ບ້ານໃຫຍ່ ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ, ຜ່ານຂໍ້ຕົກລົງຂອງທ່ານເຈົ້າເມືອງໄຊຍະບູລີ ວ່າດ້ວຍການອະນຸມັດປະກາດຮັບຮອງວັດສີບຸນເຮືອງ ບ້ານໃຫຍ່ ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ,
ຈາກນັ້ນທ່ານ ນາງ ພິລາວັນ ອົງແກ້ວ ຄະນະປະຈຳພັກເມືອງ, ຮອງເຈົ້າເມືອງໄຊຍະບູລີ ໄດ້ຂຶ້ນຜ່ານບົດລາຍງານການສ້າງວັດສີບຸນເຮືອງ ບ້ານໃຫຍ່ ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ ຊຶ່ງທ່ານໄດ້ກ່າວວ່າ: ໂດຍປະຕິບັດຕາມກົດໝາຍວ່າດ້ວຍມໍຣະດົກແຫ່ງຊາດ (ສະບັບປັບປຸງ) ເລກທີ 38/ສພຊ, ລົງວັນທີ 16 ພະຈິກ 2021 ແຜນງານຍຸດທະສາດຂອງກົມມໍຣະດົກ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ 2020-2025 ແລະ ແຜນພັດທະນາວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວຂອງແຂວງໄຊຍະບູລີວາງອອກ. ຜ່ານການຈັດຕັ້ງປະຕິບັດ ໃນແຕ່ລະໄລຍະເຫັນວ່າບ້ານແມ່ນໄດ້ມີຄວາມເອົາໃຈໃສ່ຢ່າງຕັ້ງໜ້າໃນການບູລະນະປົກປັກຮັກສາວັດຖຸພັນຕ່າງໆຢູ່ພາຍໃນວັດໄດ້ເປັນຢ່າງດີ ຊຶ່ງການກະກຽມຄວາມພ້ອມດ້ານຕ່າງໆຂອງວັດໃນການກະກຽມປະກາດເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ ຮັບຮອງເອົາວັດສີບຸນເຮືອງ ບ້ານໃຫຍ່ ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງຕາມຂັ້ນຕອນ. ໃນພິທີ ຍັງໄດ້ມອບໃບຢັ້ງຢືນການຮັບຮອງວັດສີບຸນເຮືອງເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ. ເປັນກຽດມອບໂດຍທ່ານ ດວງຕາ ໄຊວຸດ ຮອງເລຂາພັກແຂວງ, ຮັບໂດຍທ່ານ ເສນ ພັນລັກ ວ່າການເຈົ້າເມືອງໄຊຍະບູລີ.
ໃນຕອນທ້າຍຍັງໄດ້ລັ່ນຄອງ9 ບາດ, ຕັດແຖບຜ້າ, ເປີດປ້າຍ ປະກາດຮັບຮອງວັດສີບຸນເຮືອງ ບ້ານໃຫຍ່ ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ ເພື່ອເປັນສັນຍາລັກ ແລະ ເປັນສິລິມຸງຄຸນໃນພິທີປະກາດຮັບຮອງເອົາວັດສີບຸນເຮືອງ ບ້ານໃຫຍ່ເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ, ທາງອໍານາດການປົກຄອງບ້ານຍັງໄດ້ຈັດພາບາສີສູ່ຂວັນຕາມຮີດຄອງປະເພນີໃຫ້ແຂກທີ່ມາຮ່ວມພິທີຕື່ມອີກ.
