ໜ້າຫຼັກ / ການເຄື່ອນໄຫວ / ໄຊຍະບູລີຈັດກອງປະຊຸມອົງການປົກຄອງແຂວງ ປະຈໍາເດືອນສິງຫາ ແລະ ທິດທາງແຜນການເດືອນກັນຍາ ປີ 2024
ກອງປະຊຸມອົງການປົກຄອງແຂວງ ປະຈໍາເດືອນສິງຫາ ແລະ ທິດທາງແຜນການເດືອນກັນຍາ 2024 ແບບເຊິ່ງໜ້າ ແລະ ລະບົບອອນລາຍ ໄດ້ຈັດຂຶ້ນໃນຕອນເຊົ້າຂອງວັນທີ 27 ສິງຫາ 2024 ນີ້ ຢູ່ທີ່ຫ້ອງປະຊຸມຫ້ອງວ່າການແຂວງໄຊຍະບູລີ, ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ໃຫ້ກຽດເຂົ້າຮ່ວມກອງປະຊຸມຄັ້ງນີ້ມີບັນດາທ່ານຫົວໜ້າອົງການ, ກົມກອງ, ພະແນກການ, ເສນາທິການສະພາປະຊາຊົນແຂວງ, ລັດວິສາຫະກິດ ທະນາຄານອ້ອມຂ້າງແຂວງ ແລະ ທ່ານເຈົ້າເມືອງ 11 ເມືອງເຂົ້າຮ່ວມແບບເຊິ່ງໜ້າ ແລະ ທາງໄກ.
ໃນກອງປະຊຸມຄັ້ງນີ້ ເນື້ອແທ້ແມ່ນພວກເຮົາຈະໄດ້ພ້ອມກັນຮັບຟັງ ແລະ ຄົ້ນຄວ້າປຶກສາຫາລືບັນດາໜ້າວຽກທີ່ສໍາຄັນຂອງແຂວງ ປະຈໍາເດືອນສິງຫາ ແລະ ທິດທາງແຜນການຈຸດສຸມປະຈໍາເດືອນກັນຍາປີ 2024 ເປັນຕົ້ນ ຮັບຟັງລາຍງານສະພາບພົ້ນເດັ່ນ ຂອງອົງການປົກຄອງແຂວງ ໃນການຈັດຕັ້ງປະຕິບັດວຽກຈຸດສົມໃນເດືອນ ສິງຫາ ແລະ ກໍານົດທິດທາງວຽກຈຸດສຸມ ເດືອນ ກັນຍາ 2024, ຮັບຟັງລາຍງານການຈັດຕັ້ງປະຕິບັດວຽກງານປ້ອງກັນຊາດ ແລະ ຮັກສາຄວາມສະຫງົບລາບຕາມບໍລິເວນຊາຍແດນ, ຮັບຟັງລາຍງານການຈັດຕັ້ງປະຕິບັດວຽກງານປ້ອງກັນຊາດປ້ອງກັນຄວາມສະຫງົບ ກ່ຽວກັບການແກ້ໄຂບັນກາຫຍໍ້ທໍ້ໃນສັງຄົມ, ຮັບຟັງລາຍງານການຈັດຕັ້ງປະຕິບັດລາຍຮັບ-ລາຍຈ່າຍງົບປະມານ ແລະ ການຈັດຕັ້ງປະຕິບັດນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ, ຮັບຟັງລາຍງານກ່ຽວກັບການບົວລະບັດຮັກສາພຶດລະດູຝົນ ແລະ ການເຝົ້າລະວັງການລະບາດຂອງພະຍາດສັດຕູພືດ ແລະ ພະຍາດສັດ, ຮັບຟັງລາຍງານກ່ຽວກັບບັນຫາສະພາບໄພພິບັດທີ່ເກີດຂຶ້ນຢູ່ພາຍໃນແຂວງ, ຮັບຟັງລາຍງານກ່ຽວກັບການກະກຽມຄວາມພ້ອມໃຫ້ແກ່ການໄຂສົກຮຽນໃໝ່ ສົກປີ 2024-2025, ຮັບຟັງການເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ແລະ ການຕິດຕາມຊຸກຍູ້ນິຕິກໍາໃຕ້ກົດໝາຍຂອງແຂວງ. ຈາກນັ້ນປະທານກອງປະຊຸມ ໄດ້ມີຄໍາເຫັນເຈາະຈິ້ມ ແລະ ບັນດາທ່ານເຂົ້າຮ່ວມແບບເຊິ່ງໜ້າ ແລະ ທາງໄກ ກໍ່ໄດ້ປະກອບຄໍາຄິດຄໍາເຫັນຢ່າງພາວະວິໄສ ເຊິ່ງຍົກໃຫ້ເຫັນດ້ານຕັ້ງໜ້າ ແລະ ປັດໃຈໃໝ່ທີ່ພົ້ນເດັ່ນ, ດ້ານອ່ອນ, ຂໍ້ຄົງຄ້າງ ເພື່ອຈະພ້ອມກັນສູ້ຊົນແກ້ໄຂໃນຕໍ່ໜ້າ.
